တန်ဖိုးနည်း ဆင်မ်းကတ်များခွဲဝေမှုနှင့် ပတ်သက်၍ မော်လူးဒေသခံတို့၏ အသံများ
မော်လူး၊ အောက်တိုဘာ ၁၆
@@@@@@@@@@@@@@@@@@@@@@@@@@@@@@
စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ်၊ မော်လူးဒေသတွင် GSM မိုဘိုင်းဖုန်း တန်ဖိုးနည်း ဆင်မ်းကတ်များကို သြဂုတ်လမှစ၍ ၁၅၀၀ ကျပ်ဖြင့် မဲနှိုက် ဖြန့်ချီပေးခဲ့ရာ ယနေ့ထိ တတိယအကြိမ်သို့ ရောက်ခဲ့ပြီဖြစ်ကြောင်း သိရသည်။ ပထမအကြိမ် ဖြန့်ဝေမှုမှာ ၂၀၀ ကတ်၊ ဒုတိယအကြိမ်ဖြန့်ဝေမှုမှာ ၃၀၀ ကတ်၊ တတိယအကြိမ် ဖြန့်ဝေမှုမှာ ၂၀၀ ကတ်ဖြစ်ပြီး သုံးကြိမ်စုစုပေါင်း ဆင်မ်းကတ်အရေအတွက် ၇၀၀ ဖြစ်ကြောင်း သတင်းရရှိသည်။
ထိုဆင်းမ်ကတ်များကို သက်ဆိုင်ရာ မော်လူးဒေသ ဖုန်းကတ်ခွဲဝေရေး ကော်မတီ၏ ဖုန်းကတ်ခွဲဝေမှု နည်းစနစ်နှင့် ပတ်သက်၍ ဒေသခံကျေးလက်ပြည်သူတို့၏ အသံများကို ဖော်ပြလိုက်ပါသည်။
" ကျွန်တော်တို့ မော်လူးဒေသဟာ ကသာခရိုင်၊ အင်းတော်မြို့နယ်ထဲ ပါရှိပါတယ်။ မော်လူးမှာ GSM ဖုန်းတာဝါတိုင် စိုက်ထူခဲ့စဉ်ကတည်းက တန်ဖိုးနည်း ဖုန်းတွေ ဖြန့်ချီ ရောင်းချပေးမယ်ဆိုပြီး ကြေညာတဲ့ အချိန်ကစလို့ မျှော်လင့်ခဲ့ပါတယ်။ ဆင်းမ်ကတ် တန်ဖိုးက ၁၅၀၀ ဆိုတော့ လူတိုင်းနီးပါး သုံးစွဲနိုင်တဲ့ တန်ဖိုးမို့ မျှော်မိတာပါ။ ဒါပေမယ့် ရွှေပြည်တော် မျှော်လေတိုင်းဝေး ဆိုတာလို သုံးကြိမ်မဲနှိုက်ပေမယ့် မပေါက်တော့ မရဘူးလေ။ လုပ်ငန်းသုံးလိုပေမယ့် မဲမပေါက်တော့ မရဘူးပေါ့" ဟု ပဲခူးကျေးရွာ လုပ်ငန်းရှင်တစ်ဦးက ပြောသည်။
"ကျွန်မတို့မော်လူးဒေသက ကျေးရွာအုပ်စုပေါင်း ၁၀ အုပ်စုရှိပြီး ကျေးရွာပေါင်း ၄၃ ရွာရှိပါတယ်။ တစ်ချို့ရွာတွေမှာ ဖုန်းလိုင်းမမိပါဘူး။ တစ်ချို့ကျေးရွာတွေတော့ မိပါတယ်။ ဆင်းမ်းကတ် ဖြန့်ဖြူးရာမှာ မော်လူးမှာရှိတဲ့ အုပ်စုအလိုက် ခွဲတမ်းတွေ ချပေးတာဆိုတော့ လိုင်းမမိတဲ့ ရွာတွေကလည်း ရသွားတယ်လေ။ လိုင်းမိတဲ့ ရွာတွေမှာတော့ ခွဲတမ်းက မလုံလောက်ဘူး ဖြစ်နေတယ်။ လိုင်းမမိတဲ့ရွာက မဲပေါက်တော့ ရောင်းစားသွားတာပေါ့။ တကယ်သုံးမယ့် လူကျတော့ မရဖြစ်ရတယ်။ ဒါပြုပြင်ဖို့ကောင်းတယ်လို့ ကျွန်မပြောချင်ပါတယ်" ဟု မင်းသာရွာ လယ်သူမကြီး တစ်ဦးက ပြောသည်။
" မော်လူးဒေသအတွက်ရတဲ့ ခွဲတမ်းကို ဒေသတွင်းရှိ ရွာတွေအတွက် ခွဲတမ်းချတာ ကော်မတီက ဘယ်နှစ်ယောက်ရှိမှန်းတော့ မသိဘူး။ ကျွန်တော်သိသလောက်တော့ အုပ်စု အုပ်ချုပ်ရေးမှူးတွေဆီကို တိုက်ရိုက်တာဝန်ပေးတာပါ။ ကျွန်တော်က ဖုန်းကတ်မဲပေါက်လို့ ကံတော့ကောင်းပါရဲ့၊ သွားထုတ်တဲ့အခါ အုပ်စု အုပ်ချုပ်ရေးမှူး လက်မှတ်နဲ့ ဖုန်းအော်ပရေတာရဲ့ လက်မှတ် ဒါဆို လုံလောက်ပြီ၊ အချိန်တိုအတွင်းမှာ ထုတ်ယူနိုင်တယ်လေ။ ခုတော့ အုပ်ချုပ်ရေးမှူးဆီမှာ လက်မှတ်ထိုးခိုင်းရ၊ စာရေးမဆီမှာ တံဆိပ်တုံး ရိုက်ရ၊ ဖုန်းကော်မတီဆိုလား ရပ်မိရပ်ဖဆိုလား ဘာမှ တာဝန်မရှိတဲ့ လူကြီးတစ်ယောက်ဆီမှာ လက်မှတ်ထိုးရ၊ ဖုန်းအော်ပရေတာဆီမှာ ထုတ်ယူရတွေနဲ့ အလုပ်ကို ရှုပ်နေတာပါပဲ။ တစ်နေရာစီ တစ်ရပ်ကွက်စီ သွားပြီး လက်မှတ်ထိုးခိုင်း၊ တံဆိပ်တုံးထုခိုင်းနေရတော့ အခက်အခဲတွေဖြစ်တာပေါ့။ ဒါတော့ စနစ်တကျ တစ်ချိန်ထဲ ပြီးအောင် စီစဉ်သင့်တယ်လေ" ဟု မော်လူး ဒေသခံတစ်ဦးမှ ပြောသည်။
" ဆင်းမ်ကတ်တွေ မဲနှိုက်ပြီး ဖြန့်ဖြူးတာ၊ တန်ဖိုးနည်းတာ ကောင်းပါတယ်၊ လူတိုင်းအတွက် ကောင်းပါတယ်။ ဒါပေမယ့် ဝန်ထမ်းပိုင်းဆိုင်ရာ ခွဲဝေမှု စနစ်ကျအောင် လုပ်ဖို့တော့ လိုတယ်။ ခုတတိယအကြိမ် ဖုန်းကတ် ၂၀၀ ကို ခွဲဝေတာက မော်လူးခွဲတမ်းထဲက ၁၀ ကတ်ဟာ ခရိုင်ကို ပေးရတယ်လို့ သိရတယ်။ ဒုတိယအကြိမ် ၃၀၀ ရတဲ့ အထဲကလည်း ၁၈ ကတ်ပေးရတယ်ဆိုတယ်။ ကျွန်တော်တို့သိတာက ခရိုင်ကလဲ ခွဲတမ်းရတာဘဲ။ အင်းတော်၊ ကသာ၊ မော်လူးခွဲတမ်းက ပထမအကြိမ်လည်း ၂၀၀ စီ၊ ဒုတ်ယအကြိမ်လည်း ၃၀၀ စီ၊ တတိယအကြိမ်လည်း ၂၀၀ စီ အတူတူရပါလျက်နဲ့ မော်လူးခွဲတမ်းထဲက ဘာကြောင့် နှိုက်ယူရတာလဲ။ ဒုတ်ယအကြိမ်တုန်းက ခရိုင်အတွက်ဆိုပြီး ၁၈ ကတ်၊ တတိယအကြိမ်မှာ ၁၀ ကတ်၊ စတုတ္ထအကြိမ် ရရင်လည်းပေးရဦးမှာလား ။ ဒါဆို လွန်နေပြီပေါ့" ဟု ဒေသခံ ဝန်ထမ်း တစ်ဦးမှ ပြောသည်။
” ကျွန်မက ပညာရေးဋ္ဌာနကပါ။ ဝန်ထမ်းအတွက် မော်လူးခွဲတမ်း ၂၀၀ ထဲက ၆၆ ကတ်ပဲရတာ။ ဒီထဲက ၁၀ ကတ်ကို ခရိုင်ကိုပေးရတယ်ဆိုတော့ မော်လူးဒေသခံ ဝန်ထမ်းတွေအတွက် အခွင့်အရေးနည်းသွားတာပေါ့။ ကျွန်မ မဲမပေါက်ပါဘူး။ အဲ့ဒီ ၁၀ ကတ်ဟာ ဝန်ထမ်းအတွက်အပြည့်အဝဆိုရင် ကျွန်မပေါက်ချင်ပေါက်မှာပေါ့။ ခရိုင်လည်း သူ့ခွဲတမ်းနဲ့သူ ရှိသားနဲ့ မော်လူးထဲက ပေးရတယ်ဆိုတာ သဘာဝမကျဘူးလို့ မြင်ပါတယ်" ဟု မူလွန်ဆရာမ တစ်ဦးက ဆိုသည်။
" ဝန်ထမ်းအတွက် ၆၆ ကတ်ထဲက အခြားဆိုပြီး မော်လူးမှာ မရှိတဲ့ ရုံးမရှိတဲ့ ဝန်ထမ်းအတွက် ပေးတာကတော့ သိပ်ဘဝင်မကျပါဘူး။ ယခင်စိုက်ပျိုးရေး ဝန်ထမ်းဆိုပြီး ပြောပါတယ်။ ဒါပေမယ့် မော်လူးမှာ စိုက်ပျိုးရေးရုံး မရှိပါဘူး။ စိုက်ပျိုးရေးဝန်ထမ်းဟာ မြို့နယ် စိုက်ပျိုးရေး ဝန်ထမ်းသာ ဖြစ်လို့ မြို့နယ်နဲ့သာ သက်ဆိုင်တာလေ မြို့နယ် ခွဲတမ်းထဲမှာ ထည့်ပေါ့။ ဟိုတုန်းက စိုက်ပျိုးရေးစခန်းဟာ အထွက်တိုးစခန်းအဖြစ် အကောင်အထည်ဖော်ပြီး မြို့နယ် စိုက်ပျိုးရေးလုပ်ငန်း ( ယခင်လယ်စိုက်ရှင်း) ဝန်ထမ်းများဖြစ်တဲ့ ယခင် ကျေး/ဂျာ (ယခု ကျေး/မှူး) ဆိုတဲ့ ကွင်းဆင်းဆောင်ရွက်ရတဲ့ ကွင်းစာရေး ဝန်ထမ်းတွေပါ။ သူတို့ဟာ မြို့နယ်ရုံး ဝန်ထမ်းပါ။ မော်လူးဟာ အင်းတော်မြို့နယ် ရုံး ဝန်ထမ်းက ဆောင်ရွက်ရတာပါ။ အင်းတော်မြို့နယ်ရုံးရဲ့ ခံစားခွင့်ထဲမှာ ပါရှိရမှာပါ။ ပြီးတော့ ဝန်ထမ်းပိုင်းဆိုင်ရာက ခွဲဝေမှုမှာ တချို့ဋ္ဌာနက ဝန်ထမ်းနည်းပြီး ဆင်းမ်ကတ်အရေအတွက် သုံးကြိမ်အတွင်းမှာများပြီး၊ ဝန်ထမ်းများတဲ့ ဋ္ဌာနမှာ ခွဲတမ်းအရေအတွက် နည်းနေတယ်။ ဆက်သွယ်ရေးအောက်မှာ စာတိုက်နဲ့ ကြေးနန်းကတစ်ခု၊ အော်တိုတယ်လီဖုန်းက တစ်ခု၊ ဋ္ဌာနနှစ်ခုဖြစ်ပြီး သုံးကြိမ်မြောက်အထိရတဲ့ အနေအထားက ဝန်ထမ်းသုံးဦးရှိတဲ့ စာတိုက်ကြေးနန်းက နှစ်ကတ်သာဖြစ်ပြီး၊ ဝန်ထမ်းသုံးဦးရှိတဲ့ အော်တိုဖုန်းဋ္ဌာနက ၅ ကတ်ဖြစ်နေတယ်။ ဒါဟာ မမျှတတဲ့ ခွဲဝေမှုဖြစ်နေတာ ထင်ရှားပါတယ်" ဟု မော်လူးဒေသခံ ဝန်ထမ်းတစ်ဦးက ပြောသည်။
မော်လူးဒေသ၏ တန်ဖိုးနည်း ဖုန်းဆင်းမ်ကတ်များ ဖြန့်ဝေရာတွင် မှန်ကန်မျှတမှု ရှိသော ဖြန့်ချီမှု နည်းစနစ်တို့ဖြင့် ဖြန့်ဝေပေးနိုင်ရန် စေတနာကောင်ဖြင့် တင်ပြလိုက်ရပါသည်။
မော်လူးဒေသတွင် ဝါးပိုးမျှစ်ဈေးကွက် အရောင်းအဝယ်ဖြစ်
မော်လူး၊ အောက်တိုဘာ ၁၅
@@@@@@@@@@@@@@@@@@@
စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ်၊ မော်လူးဒေသတွင် ၊ ရာသီထွက်ကုန်ဖြစ်သည့် ဝါးပိုးမျှစ်များမှာ အရောင်းအဝယ်ဖြစ်သည့် အတွက် ဒေသခံများ နေ့စဉ် ဝင်ငွေကောင်းလျှက်ရှိကြောင်း သိရသည်။
မော်လူးဒေသတွင် မိုးရာသီကာလ၌ ဝါးပိုးမျှစ်၊ သင်းမျှစ်၊ သိုက်မျှစ်၊ ဝါးပါးမျှစ်၊ ဝါးဖြူမျှစ်အစရှိသည့် မျှစ်များ ပေါက်ရောက်လျှက်ရှိသော်လည်း ယခုကဲ့သို့ မိုးနှောင်းကာလတွင် ပေါက်ရောက်သည့် ဝါးပိုးမျှစ်မှာ လူကြိုက်များပြီး အရောင်းအဝယ်ဖြစ်နေရာ ဒေသခံများအတွက် နေ့စဉ်ဝင်ငွေကောင်းလျှက်ရှိသည်။
" ဝါးပိုးမျှစ်က ရာသီထွက်ကုန်ပါ။ မျှစ်ကို အချဉ်သိပ်တယ်၊ အမျိုးမျိုးလည်း ချက်ပြုတ်စားသောက်ကြပါတယ်။ အခြောက်လှန်းတယ်။ ဒေသတွင်းကလူတွေ စားသုံးရုံမကပဲ အထက်မြန်မာပြည် ကချင်ပြည်နယ်၊ မြစ်ကြီးနား၊ မြန်မာနိုင်ငံ အလယ်ပိုင်း မြို့တွေကိုလည်း တင်ပို့နေရပါတယ်။ ဒေသတွင်းပေါက်ဈေးကတော့ ချိုးပြီးသား မျှစ်စိမ်း တစ်ပိဿာ ၂၀၀ကျပ် ရှိတယ်။ လူတစ်ဦးကို တစ်ရက်မှာ ၂၅ ပိဿာကနေ ၃၅ ပိဿာအထိရနိုင်တော့ ..ဝင်ငွေက ၅၀၀၀ ကျပ်ခန့်အထိ ရနေကြတာမို့ အဆင်ပြေနေတယ် ပြောရမှာပါ"ဟု မော်လူးဒေသ၊ မာန်ဟဲကျေးရွာအုပ်စု၊ မြေပလ္လင်ကျေးရွာနေ မျှစ်အဝယ်ဒိုင်မှ အမျိုးသမီးကြီး တစ်ဦးက ပြောပြသည်။
မိုးဦးကာလ မေ၊ ဇွန်လများမှ စပြီး မော်လူးဒေသတွင် သိုက်မျှစ်များစတင်ပေါ်ချိန် မျှစ်ဈေးမှာ တစ်ပိဿာကျပ် ၅၀၀မှ ၇၀၀ ခန့်အထိ ပေါက်ဈေးရှိသော်လည်း ပေါများလာချိန်တွင် ဈေးမှာလည်း တစ်ပိဿာ ၃၀၀ကျပ်သာ ရကြောင်း၊ မော်လူးဒေသတွင် သင်းမျှစ်၊ သိုက်မျှစ်၊ ဝါးဖြူမျှစ်တို့ကို မြန်မာနိုင်ငံ အလယ်ပိုင်း ရွှေဘို၊ မန္တလေး၊ မုံရွာမြို့များသို့ တင်ပို့ရောင်းချရကြောင်း၊ ဝါးပိုးမျှစ်မှာမူ မျှစ်ချဉ်ပြုလုပ်ခြင်း၊ မျှစ်ခြောက်ပြုလုပ်၍ တရုတ်ပြည်သို့တင်ပို့ခြင်းနှင့် တရုတ်လူမျိုးများ ၁၂ မျိုးဟင်းချက်ပြုတ်ရာတွင် အဓိက ဟင်းအမယ် တစ်ခုအဖြစ် လူကြိုက်များကာ အရောင်းအဝယ်ဖြစ်ခြင်းတို့ကြောင့် ယခုအချိန်တွင် ဝါးပိုးမျှစ် တစ်မျိုးတည်းသာ ဈေးကွက်ဝင် အရောင်းအဝယ်ဖြစ်လျှက်ရှိကြောင်း သိရသည်။
CYCLONE
