ဝ နဲ့ မိုင်းလား ပြသနာ စိတ်ဝင်စားသူများ ဖတ်ဖို့

" ပန်ဒိုရာဘောက်စ် ပွင့်ပြီး ၀တပ်ဖွဲ့တို့  ပျံသန်းလာချိန် "
----------------------------------------------------------------
ရေးသားသူ - နေရီ

ဒီ လပိုင်း ရက်ပိုင်းမှာ ၀ ကိုယ်ပိုင်အုပ်ချုပ်ခွင့်ရတိုင်းရဲ့ နိူင်ငံရေး စစ်ရေး လှုပ်ရှားမှုတွေ အများကြီး ပေါ်ထွက်လာပါတယ် ။ အရင်က ဒီလောက် ကြီးကြီးကျယ်ကျယ် မဖြစ်ခဲ့တာ အတော်ကြာပါပြီ ။ အခုမှ ဘာလို့ ဖြစ်လာရသလဲ မေးလျှင်တော့ တစ်ခုပဲ ဖြေစရာရှိပါတယ် ။ နိူင်ငံရေး အခင်းအကျင်းတွေ ပြောင်းလဲကုန်လို့ ပါ ။ စစ်ရေးဟာ နိူင်ငံရေးထဲက နည်းလမ်းတစ်ခု ဖြစ်တဲ့ အတွက် နိူင်ငံရေး အပြောင်းအလဲတွေ ဖြစ်လာတဲ့ အခါမှာ စစ်ရေးအရလှုပ်ရှားမှုတွေလဲ အများကြီး ဖြစ်လာတာ ဖြစ်ပါတယ် ။ 

ပထမဆုံး ဖြစ်လာတဲ့  နိူင်ငံရေး အပြောင်းအလဲက အားလုံးသိကြတဲ့ အတိုင်း ၂၀၁၅ ရွေးကောက်ပွဲမှာ အမျိုးသားဒီမိုကရေစီ အဖွဲ့ချုပ် အနိူင်ရသွားတာပဲ ဖြစ်ပါတယ် ။ အစိုးရအချိန်းအပြောင်း ဖြစ်လျှင် ပေါ်လစီပိုင်း အချိန်းအပြောင်းလေးတွေ ဖြစ်ကြတာလဲ ဓမ္မတာပါပဲ ။ သို့ သော် အမျိုးသား ဒီမိုကရေစီအဖွဲ့ချုပ် အစိုးရ အချိန်းအပြောင်းဟာ ဒီထက်မက အများကြီးပိုမို လေးနက်ပါတယ် ။ ဘာကြောင့်လဲဆိုတော့ ဒီအစိုးရဟာ ၁၉၆၂ ခုနှစ်နောက်ပိုင်း ပထမဆုံး ပေါ်ပေါက်လာတဲ့  Legitimacy အားအကောင်းဆုံး အစိုးရတစ်ခု ဖြစ်နေလို့ ပါပဲ  ။



နိူင်ငံတကာကလဲ အသိအမှတ်ပြုမယ် ။ ကိုယ့်ပြည်တွင်းမှာလဲ လူထုထောက်ခံမှု အများစုရထားတဲ့  အစိုးရတစ်ရပ်ရဲ့ လုပ်ဆောင်မှုတွေဟာ အပြည့်အ၀ အားကောင်းစွာ တရားဝင်ပါတယ် ။ ဒါဟာ အရင် ဘယ်အစိုးရမှ မရခဲ့တဲ့  အခွင့်အလမ်း ဖြစ်ပါတယ် ။ စစ်အစိုးရဟာ တိုင်းပြည်ကို တည်ငြိမ်သွားအောင် ၊ အပစ်အခတ်ရပ်သွားအောင် လုပ်ဆောင်နိူင်ပေမယ် ပြည်နယ်တွေ တိုင်းရင်းသားတွေအရေးနဲ့ ပတ်သက်ပြီး နိူင်ငံရေးအရ ကြီးကြီးကျယ်ကျယ် အချိန်းအပြောင်းတွေကို တရားဝင်အောင် လုပ်ဖို့ သိပ်ခက်ပါတယ် ။ ဘာကြောင့်လဲဆိုတော့ သူက နဂိုကနဦးကတည်းက အာဏာသိမ်းပြီး တက်လာခဲ့တဲ့  အစိုးရကိုး  ။ သူ လုပ်ခဲ့လျှင်လဲ ဒါ ပြည်သူ့ ဆန္ဒမဟုတ်ဘူး ၊ အများဆန္ဒ မဟုတ်ဘူး  ၊ စစ်အစိုးရက ဇွတ် လုပ်သွားတာလို့  အပြောခံ အစွပ်အစွဲ ခံရမှာပါပဲ ။ 

ဦးသိန်းစိန် အစိုးရလက်ထက်မှာလဲ ဒီပြသနာက အထိုက်အလျောက် ကျန်ရှိနေပါသေးတယ် ။ ဒါပေမယ့် အမျိုးသား ဒီမိုကရေစီ အဖွဲ့ချုပ် အစိုးရ လက်ထက်မှာတော့ ဒီပြသနာ မရှိတော့ပါဘူး ။ ဒါကြောင့် ဒီချုပ်အစိုးရရဲ့ ဆောင်ရွက်ချက်တွေကို သဘောမတူလျှင် ကိုယ့်လိုလားချက် နဲ့  မကိုက်ညီလျှင် အရင်လို မသိကျိုးကျွံ ပြုနေလို့ မရပါဘူး ။ နောက်မှ ထပြီး ပြင်လို့ လဲ မရနိူင်ပါဘူး ။ ဒါဟာ ၀ ကိုယ်ပိုင်အုပ်ချုပ်ခွင့်ရ တိုင်းကို လှုပ်ရှားမှုတွေ ဖြစ်လာရတဲ့  အဓိက အကြောင်းအချက်ဖြစ်ပါတယ် ။

ဒီချုပ် အစိုးရအဖွဲ့မှာ ငြိမ်းချမ်းရေးကဏ္ဍကို ကိုင်တွယ်သူဟာ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဖြစ်ပါတယ် ။ အထူးအလေးထား အခံရဆုံး ကဏ္ဍဖြစ်သလို အစိုးရသစ် တက်တက်ချင်း ပထမဆုံး စအကောင်အထည်ဖော်ခဲ့တဲ့  ကဏ္ဍလဲ ဖြစ်ပါတယ် ။ ဒေါ်အောင်ဆန်းစုကြည် ရဲ့ပြုမူဆောင်ရွက်ချက်တွေထဲမှာ ၀ ကိုယ်ပိုင်အုပ်ချုပ်ခွင့်ရ တိုင်းကို တိုက်ရိုက် အကျိုးသက်ရောက်စေတဲ့  အဓိက အချက်နှစ်ချက် ရှိပါတယ် ။ အဲဒီအချက်တွေကတော့ ၁။ ၂၁ရာစု ပင်လုံ ညီလာခံ  ၂။ တရုတ် နှင့် ဆက်ဆံရေး စတဲ့ အချက် နှစ်ချက် ဖြစ်ပါတယ် ။ 

၂၁ ရာစု ပင်လုံ ညီလာခံ 
----------------------------
ဒေါ်အောင်ဆန်းစုကြည် အနေနဲ့  ၂၁ ရာစု ပင်လုံညီလာခံ ကျင်းပမယ်ဆိုပြီး ကြေငြာလိုက်တဲ့ အချိန်မှာ NLD ၀န်းရံသူတွေက တစ်ခဲနက် ထောက်ခံကြပါတယ် ။ လူမှုကွန်ယက်မှာလဲ ပရိုဖိုင်တွေပြောင်းကြ ပင်လုံညီလာခံကို ၀န်းရံကြ စသဖြင့် ကြွေးကြော်ကြတာပေါ့လေ ။ သို့ သော် တပ်မတော် အသိုင်းအ၀ိုင်းကတော့ ၂၁ရာစု ပင်လုံဆိုတဲ့  အသုံးအနူန်းကို အတော်လေး စိတ်မသက်မသာ ဖြစ်တဲ့  အရိပ်အယောင်တွေ လူမှုကွန်ယက်ပေါ်မှာ တွေ့ ကြရပါတယ် ။ သူတို့ ထဲက အတော်များများဟာ ဒီ အပစ်ရပ် အဖွဲ့အစည်းတွေနဲ့  နှစ်ရှည်လများ ထိတွေ့ ဆက်ဆံခဲ့ကြသူတွေပါ ။ 

NLD ၀န်းရံသူတွေက ဒေါ်အောင်ဆန်းစုကြည် အပေါ် အားကိုးမှုတွေ  ယုံကြည်ချက် မျှော်လင့်ချက်တွေ အပေါ် အခြေခံပေမယ့်  တပ်မတော် အသိုင်းအ၀ိုင်းကတော့ မြေပြင်ရဲ့ပကတိအခြေအနေပေါ်က အခြေခံစဉ်းစားပြီး စိတ်မသက်မသာ ဖြစ်ကြပုံရပါတယ် ။ စာရေးသူရဲ့ မိတ်ဆွေတစ်ဦးကတော့ ဒေါ်အောင်ဆန်းစုကြည်ဟာ ပန်ဒိုရာဘောက်စ်ကို သွားဖွင့်လိုက်ပြီလို့  စိတ်ပျက်လက်ပျက် မှတ်ချက်ပြုပါတယ် ။

ငြိမ်းချမ်းရေးဆွေးနွေးပွဲတွေဟာ အောက်ခြေအဆင့် တွေ့ ဆုံဆွေးနွေးမှု  ၊ ပြီးတော့  ပြည် နယ်အဆင့် ဆက်တက် ၊ သဘောတူညီချက်ရလျှင် ပြည်ထောင်စု အဆင့်ကို ဆက်သွား ၊ အဲဒီမှာ အိုကေပြီဆို ညီလာခံလုပ် လက်မှတ်ထိုး ၊ ပြီးလျှင် အဲဒီသဘောတူညီချက်ကို လွှတ်တော်က အသိအမှတ်ပြု ။ ဒီလို အဆင့်မျိုးတွေ နဲ့  အဆင့်ဆင့် တက်သွားတာပါ ။ အဲဒီလို သွားတာမဟုတ်ဘဲ ပြောင်းပြန်လုပ်ပြီး ညီလာခံကို အရင်ကျင်းပလိုက်ချိန်မှာ ဘာမှ မညှိရ မဆွေးနွေးရသေးတဲ့ တိုင်းရင်းသားတွေအဖွဲ့  တွေဟာ စင်ပေါ်တက်ပြီး သူတို့ လိုလားချက် မှန်သမျှ အကုန်သွန်ချ ၊ ကြေငြာချက်တွေ စာတမ်းတွေ တစ်သီကြီး ထုတ်ပါတော့တယ် ။ အဲဒီမှာ ငြိမ်းချမ်းရေးက ဘာဆက်လုပ်ရမှန်း မသိတော့သလို စင်ပေါ်တက် ပေါက်ကွဲကြတဲ့  အဖွဲ့တွေအချင်းချင်းလဲ မကျေမနပ်တွေ ဖြစ်ကုန်ကြပါတယ် ။ သူ့ လိုလားချက်နဲ့  ကိုယ့်လိုလားချက် ဖြောင့်ဖြောင့်ကြီး ဆန့် ကျင်နေတာ ၊ ထိပ်တိုက်လာတွေ့ နေတာတွေကလဲ အများကြီး ရှိနေတာကိုး ။ 

ဝ ဒေသ ရဲ့ပြသနာ 
----------------------
ပြသနာပေါင်း သောင်းခြောက်ထောင် ရှိနေတဲ့ မြန်မာပြည် ပန်ဒိုရာဘောက်စ်ထဲမှာ ၀ဒေသရဲ့ ပြသနာကတော့ ပြည်နယ် လိုချင်တဲ့  ပြသနာပါ ။ စစ်အစိုးရ လက်ထက်မှာ ဒီပြသနာကို အထက်မှာဖော်ပြခဲ့သလို စစ်အစိုးရကိုယ်တိုင်က Legitimacy အားနည်းတဲ့ အခြေအနေကြောင့်  ဝတွေအနေနဲ့ အရမ်းမပြောဘဲ အောင့်နေခဲ့ပုံရပေမယ့်  ဒီချုပ်အစိုးရ လက်ထက်မှာတော့ ရေးသမျှ ထုတ်ပြန်ချက်တွေမှာ ၀ပြည်နယ် အစိုးရလို့  တွင်တွင်သုံးလာပါတယ် ။ တောင်ပိုင်း နဲ့  မြောက်ပိုင်း တစ်ဆက်တစ်စပ်တည်း ရှိတဲ့  ၀ပြည်နယ် ရရေးဟာ ၀ အထူးဒေသရဲ့ မဟာလိုလားချက် ဖြစ်ပါတယ် ။ 

အခု ဒေါ်အောင်ဆန်းစုကြည် သွားနေတဲ့  ၂၁ ပင်လုံအတိုင်းဆိုလျှင် ၀ပြည်နယ် ကိစ္စဟာ အခြေအနေ သိပ်မကောင်းနိူင်ပါဘူး ။ ဒီကြားထဲ ၀ တောင်ပိုင်း နဲ့  မြောက်ပိုင်းကို ကြားကခံနေ တဲ့  မိုင်းလား အထူုးဒေသက ဦးစိုင်းလင်းက ၂၁ ပင်လုံကို အားပါးတရ သွားတက်နေတာဟာ ဒုတိယဆင့် အဖွဲ့လောက်သာ စေလွှတ်ထားတဲ့  ၀တွေအတွက် အတော်လေး စိတ်မသက်မသာ ဖြစ်နေပုံရပါတယ် ။ ဦးစိုင်းလင်း ကိုယ်တိုင် ၂၁ ပင်လုံကို သွားမတက်ဖို့  ၀တွေက ကြိုညှိနိူင်းထားတာ ရှိ မရှိ မသိရပေမယ့်  ဦးစိုင်းလင်း ကိုယ်တိုင်သွားတက်တာကို သဘောမကျတဲ့ အချက်ကတော့ သိသာ ထင်ရှားပါတယ် ။ဒါဟာ အခု မိုင်းလားမှာ ဖြစ်လာတဲ့ ပြသနာတွေရဲ့ အခြေခံ ပါပဲ ။ 

မိုင်းလားဒေသဟာ ၀ တောင်ပိုင်း နဲ့  မြောက်ပိုင်းကြားမှာ ရှိပါတယ် ။ ဒီဒေသကို ထိန်းချုပ်နိူင်လျှင်  ၀တောင်ပိုင်း နဲ့  မြောက်ပိုင်းက တစ်ဆက်တည်း ဖြစ်ရေးဟာ အတော်နီးစပ်လာပါပြီ ။ ဦးစိုင်းလင်း နဲ့  ၀တွေဟာ ဟိုးတုန်းကတည်းက မဟာမိတ်တွေပါ ။ ဒီအတွက် ၀ပြည်နယ် တစ်ဆက်တည်း ဖြစ်ရေး ကြားကခံနေတဲ့  မိုင်းလားဒေသဟာ ၀ အတွက် ပြသနာ သိပ်မရှိခဲ့ပါဘူး ။ 

သို့ သော် ဦးစိုင်းလင်း အနေနဲ့  ၂၁ ပင်လုံကို အားပါးတရ သွားတက်ချိန်မှာ ၀တွေအကြား မေးစရာ မေးခွန်းတစ်ခု ပေါ်လာပါတယ် ။ ဦးစိုင်းလင်းဟာ အမြဲတန်း မဟာမိတ် ဖြစ်နိူင်ပါ့မလား ။ အကယ်လို့  မဟာမိတ် မဟုတ်တော့လျှင် ဘယ်လို လုပ်ကြမလဲ ဆိုတဲ့ မေးခွန်းပါ ။ အဲဒီ မေးခွန်းရဲ့နောက်မှာ မိုင်းလားထဲကို ၀တပ်ဖွဲ့ဝင် ထောင်နဲ့ ချီ ၀င်လာပြီး အချက်အခြာကျတဲ့  မိုင်းလား တပ်စခန်း သုံးခုကို သိမ်းပိုက်လိုက်ပါတယ် ။ ၀ တောင်ပိုင်း နဲ့  မြောက်ပိုင်းကို အလွယ်တကူ  ဆက်သွယ်နိူင်တဲ့ ဆက်သွယ်ရေး လမ်းကြောင်းကို စတင်ထိန်းချုပ်ဖို့   ကြိုးစားလာတယ်လို့ လဲ ဆိုနိူင်ပါတယ် ။

တရုတ် နှင့် ဆက်ဆံရေး 
----------------------------------
အခု လက်ရှိအချိန်ဟာ အရင် ၁၉၇၀ ပြည့်လွန် ဗကပ ကို တရုတ်က အကြီးအကျယ် အားပေးအားမြှောက်ပြုခဲ့တဲ့ ကာလတွေနဲ့  မတူတဲ့  အချက်တစ်ချက်တွေ ရှိနေပါတယ် ။ အဲဒါကတော့ တရုတ် ရဲ့ အကျိုးစီးပွားတွေ မြန်မာပြည်ထဲမှာ အမြောက်အများ ရှိနေတဲ့  ကိစ္စပါ ။ ဒီကိစ္စဟာ မြန်မာ - တရုတ် နယ်စပ်က တိုင်းရင်းသား လက်နက်ကိုင်အဖွဲ့တွေအပေါ်ထားတဲ့  တရုတ်ရဲ့ ရှေးဟောင်း ဘာဖာပေါ်လစီကို အကြီးအကျယ် အကျိုးသက်ရောက်စေပါတယ် ။ ဒေါ်အောင်ဆန်းစုကြည် အစိုးရတက်လာတာ ခုနှစ်လ ရှိနေပါပြီ ။ တရုတ်နိူင်ငံဆီကိုလဲ ခရီးထွက်ခဲ့ပြီးပါပြီ ။ သို့ သော် မြစ်ဆုံ စီမံကိန်း နဲ့  ပတ်သက်လို့  အစိုးရသစ်ဟာ တစ်ခွန်းတစ်ပါဒမှ မဟဘဲ တုံဏိဘာဝေ လုပ်နေဆဲပါ ။ ဒီကြားထဲမှာ နယ်စပ်က တိုင်းရင်းသား လက်နက်ကိုင် အဖွဲ့တွေဆီကို တရုတ်က ကိုယ်စားလှယ်စေလွှတ်တယ်လို့  သတင်းတွေ ထွက်လာတဲ့  အတွက် တရုတ်ရဲ့ ရှေးဟောင်း ဘာဖာ ပေါ်လစီ ပြောင်းလဲချိန် တန်ပြီလားဆိုတဲ့  မေးခွန်းထွက်ပေါ်လာပါတယ် ။ 

တရုတ် ကပေါ်လစီပြောင်းပြီ ဆိုရင်တော့ ၀တွေ အနေနဲ့  ယိုးဒယားဘက် နယ်စပ်ထွက်ပေါက် ရှိထားဖို့ သေရေးရှင်ရေး အရေးကြီးလာပါတယ် ။ ၀တောင်ပိုင်း နဲ့  မြောက်ပိုင်း တစ်ဆက်တစ်စပ်တည်း ရှိနေမှ ဒီနယ်စပ်ထွက်ပေါက် ကိစ္စ အဆင်ပြေမှာပါ ။ ၀တောင်ပိုင်း နဲ့  မြောက်ပိုင်း တစ်ဆက်တည်း ရှိဖို့  ရည်မှန်းချက်အတွက်   ဆိုလျှင် လမ်းကြောင်းပေါ်က အချက်အခြာနေရာတွေမှာ ၀ တပ်တွေ ရှိနေမှ ဖြစ်မှာပါ ။ အဲဒီ အချက်အခြာ နေရာတစ်ချို့ ဟာ ဦးစိုင်းလင်း ရဲ့ မိုင်းလားဒေသထဲမှာ ရှိနေပါတယ် ။ 

၂၁ ပင်လုံမှာ ဝတွေက ကျိုင်းတုံကို တောင်းတဲ့ကိစ္စဟာ   ဒီ ယိုးဒယားထွက်ပေါက် ရည်မှန်းချက်နဲ့ ဆက်စပ်နေနိူင်သလို  မိုင်းလားထဲကို ၀ တပ်တွေ ချက်ချင်း ၀င်လာစေတဲ့  အဓိက အချက်တစ်ချက်လဲ ဖြစ်နိူင်ပါတယ် ။

အစိုးရ နဲ့  တပ်က ဘယ်လို တုန့် ပြန်သလဲ 
---------------------------------------------
တပ်ကတော့ တပ်ထုံးစံအတိုင်း တစ်ဖက်က တပ်တည် တပ်လှုပ် ဖြစ်ပြီဆိုတာနဲ့  ကြိုတင်ပြင်ဆင်မှုတွေ သူကလဲ ပြန်လုပ်ပါတယ် ။ ဆက်စပ်ဧရိယာတွေ ဖြစ်တဲ့  အရှေ့ မြောက်တိုင်း စစ်ဋ္ဌာနချုပ် ၊ အရှေ့ အလယ်ပိုင်းတိုင်း စစ်ဋ္ဌာချုပ် ၊ တြိဂံဒေသတိုင်း စစ်ဋ္ဌာနချုပ်တွေမှာ တပ်တွေ အကြီးအကျယ် လှုပ်ရှားပြင်ဆင်နေပါတယ် ။ သို့ သော် တရားဝင် ဘာမှ ပြောဆိုတာ မရှိသေးပါဘူး ။ ဘယ်တော့မှ စပြောသလဲဆို ဒေါ်အောင်ဆန်းစုကြည် ကာလုံအစည်းအဝေး လုပ်ပြီးချိန်မှာ ၀တပ်တွေ ပြန်ဆုတ်ပေးဖို့  တပ်က တရားဝင် ထုတ်ပြောလာတာ တွေ့ ရပါတယ် ။ ကာလုံရဲ့ အတည်ပြုချက်အရ ထွက်ပေါ်လာတဲ့  အမိန့် ဖြစ်ပုံရပါတယ် ။

တစ်ဖက်ကလဲ ဒေါက်တာတင်မျိုးဝင်းတို့ အဖွဲ့က စေ့စပ်ဆွေးနွေးဖို့ ကြိုးစားပါတယ် ။ သို့ သော် ၀ဘက်ကတော့ ဦးစိုင်းလင်း နဲ့  သူတို့ ပဲ ရှင်းမယ် ။ ကျန်တဲ့ သူ ပါစရာ မလို ဆိုတဲ့  သဘော ပြန်လည်တုန့် ပြန်ပါတယ် ။ ၀တောင်ပိုင်း နဲ့  မြောက်ပိုင်းကို အလွယ်တကူ  ဆက်သွယ်နိူင်တဲ့    လမ်းကြောင်း မိုင်းလားဒေသ အချက်အခြာနေရာတွေက ၀တပ်တွေ ဖယ်မပေးဘူး ဆိုတဲ့  သဘောပါပဲ ။ စစ်ဖြစ်နိူင်သလား မေးခွန်းမေးရတဲ့ အထိ တင်းမာမူ ဖြစ်လာတာပါ ။

စစ်ပွဲ ဖြစ်လာလျှင် ဘယ်လို အခြေအနေရှိလဲ 
---------------------------------------------------
စစ်ဖြစ်လာခဲ့လျှင်တော့ စစ်ပွဲရဲ့ အခြေအနေဟာ စစ်ပွဲ ဘယ်လောက်အတိုင်းအတာ နဲ့  ဖြစ်လာမလဲဆိုတဲ့  အချက်ပေါ်မူတည်ပါတယ် ။ တပ် ရဲ့ အနေအထားက ၀တပ်ဖွဲ့ တစ်ခုတည်းကိုတော့ ကောင်းစွာထိန်းချုပ်နိူင်တဲ့  အနေအထားရှိပါတယ် ။ ၀ တပ်ဖွဲ့ နဲ့ ကျန်တဲ့  လက်နက်ကိုင်အဖွဲ့ တွေ မတူတဲ့  အနေအထားက ကျန်တဲ့  အဖွဲ့တွေက ပြောက်ကျားတပ်ဖွဲ့အသွင်ဖွဲ့ထားပြီး ဗကပ လက်ထွက် ၀ တပ်ဖွဲ့တွေက သမားရိုးကျ စစ်တပ်ပုံစံ ဖွဲ့စည်းထားတာပါ ။ တပ်မတော် နဲ့  သမားရိုးကျ စစ်ပွဲအသွင် တိုက်နိူင်တဲ့  အခြေအနေရှိ မရှိ စစ်ဖြစ်လာလျှင် အဖြေပေါ်ပါလိမ့်မယ် ။ 

စာရေးသူရဲ့ အမြင်ကို ပြောရရင်တော့ တပ်မတော် နဲ့ နိူင်းယှဉ်လျှင် အမြောက်တပ် မှာ ၀ဟာ ကလေးသာသာပဲ ရှိပါတယ် ။ လေတပ် လုံးဝ မရှိပါဘူး ။ တင့်ကားတွေ မရှိပါဘူး ။ ဒီအချက်တွေဟာ သမားရိုးကျ စစ်မှာ အင်မတန် အရေးကြီးတဲ့  အချက်တွေပါ ။ တစ်ခါ ၀ တပ်ဖွဲ့တွေဟာ လူအင်အားများတာ မှန်ပေမယ့်  စစ်မတိုက်ရတာ ကြာလှပါပြီ ။ ၀ တပ်ဖွဲ့ရဲ့ အင်အား ငါးပုံလေးပုံဟာ တိုက်ပွဲအတွေ့ အကြုံမရှိတဲ့  လူသစ်တွေ ဖြစ်ပါတယ် ။ တပ်မတော်ဘက်က ခြေမြန်တပ်မတွေဟာ ပြီးခဲ့တဲ့  ငါးနှစ်အတွင်း အတော်လေး တိုက်ပွဲအတွေ့ အကြုံ ပြန်ရကုန်ပါပြီ ။ ဒီအချက်တွေ ခြုံငုံစဉ်းစားလျှင် ၀ ဟာ တပ်မတော် နဲ့  သမားရိုးကျပုံစံ ဆိုင်တိုက်လို့ မရနိူင်ပါ ။ 

သို့ သော် တပ်ဘက်က အခက်အခဲက စစ်မျက်နှာ အများကြီး ရင်ဆိုင်ရနိူင်တဲ့  ပြသနာပါ ။ ကချင်ပြည်နယ် ၊  ရခိုင်ပြည်နယ် ၊ လောက်ကိုင် ဒေသ ။ တစ်ခါ မြို့ ရွာများ လုံခြုံရေး ၊ သဘာဝဘေးအန္တရာယ် စတဲ့  ကိစ္စတွေမှာ တပ်တွေ အများကြီး သုံးနေရပါတယ် ။ ၀ တပ်ဖွဲ့တစ်ခုတည်းဆို ပြသနာ မရှိလှပေမယ့်  KIA ၊ TNLA ၊ MNDAA ၊ SSA ၀မ်ဟိုင်း ၊ ကယန်းပြည်သစ် စတဲ့  အဖွဲ့တွေပါ နေရာအနှံ့ တစ်ပြိုင်နက် တိုက်ကွက်ဖော်လာနိူင်တဲ့  သဘောတော့ ရှိပါတယ် ။ ဒါဆိုလျှင်တော့ တပ်ဘက်ကလဲ ဘေးကျပ်နံကျပ်တော့ ဖြစ်လာနိူင်တဲ့ အနေအထားပါ ။ 

ဒါပေမယ့် ဒီလောက်အထိ စစ်ဟာ ကျယ်ပြန့် လာလျှင် မြန်မာပြည်တစ်ခြမ်းလဲ မီးဟုန်းဟုန်း တောက်နေပါပြီ ။ အစိုးရ အနေနဲ့  စစ်ပွဲဖြစ်တဲ့  ပြည်နယ်တွေကို စစ်အုပ်ချုပ်ရေး ကြေငြာ ၊ တစ်နိူင်ငံလုံး စစ်မူမထမ်းမနေရ စနစ်ပြဋ္ဌာန်း  ၊ ကာကွယ်ရေး ဘတ်ဂျက်ကို အများကြီး မြှင့် ၊ ခေတ်မီ စစ်လက်နက် ပစ္စည်းတွေ အများကြီး ဖြည့်တင်း ၊ တိုက်တာကတော့ တပ်မတော်က တိုက်ပေါ့ ။ အစိုးရ နဲ့ ပြည်သူလူထုက ၀ိုင်းဝန်း ပံ့ ပိုးရုံပါပဲ ။ ဘယ်တတ်နိူင်ပါ့မလဲ ။ ကျွန်တော်တို့ တိုင်းပြည်ဟာ လွတ်လပ်ရေးရပြီး သုံးလအကြာမှာ စစ် စဖြစ်ခဲ့တဲ့  တိုင်းပြည် မဟုတ်ပါလား   ။    

( နေရီ )