သိမ်ဘာကြောင့် ရှိသင့်တာလဲ

သိမ်ဘာကြောင့် ရှိသင့်တာလဲ
====================
“သီမာ” ဟူသော ပါဠိသည် “အပိုင်းအခြား=နယ်နိမိတ် သတ်မှတ်ထားသော အရပ်” ဟု အဓိပ္ပါယ်ရသည်။“ရဟန်းများကံကြီးကံငယ်ပြုဖို့ရာ နယ်နိမိတ်သတ်မှတ်ထားသောအရပ်”ဟု ဆိုလိုသည်။

သိမ်ကိုမြတ်စွာဘုရားခွင့်ပြုပုံ
================
ဝိနည်း မဟာဝါခန္ဓက၌ မြတ်စွာဘုရားရှင်သည် အတူနေသံဃာများ အတူဥပုသ်ကံ စသည်တို့ ပြုခြင်းဖြင့် ညီညွတ်မူကို ဖြစ်စေလိမ့်မည်ဟု ရည်ရွယ်၍ သိမ်သမုတ်ခြင်းကို ခွင့်ပြုခဲ့ပါသည်။

သိမ်သမုတ်ခြင်း
========
သိမ်သမုတ်နည်းသည်--
(၁) ဝိသုံဂါမ (သီးခြားရွာ) တောင်း၍ သမုတ်နည်း၊
(၂) ရွာနယ်မြေတစ်ပိုင်း သိမ်း၍ သမုတ်နည်းဟူ၍ နှစ်မျိုးရှိပါသည်။
ယင်းနှစ်မျိုးတို့တွင် “ဝိသုံဂါမသိမ်” ဟူသည် ပကတိဂါမ (ပကတိရွာတစ်ရွာ) မှ ဝိသုံဂါမ (သီးခြားရွာ) သိမ်တစ်နေရာစာကို ရွာစားနာမည် တပ်၍ နိူင်ငံတော် အစိုးရတို့က သတ်မှတ်ပေး လိုက်သည်နှင့် တစ်ပြိုင်နက်လိုလို သိမ်အဖြစ်သို့ ရောက်လာသော သိမ်ဖြစ်ပါသည်။ရွာနယ်မြေ တစ်ပိုင်းသိမ်း၍ သမုတ်ဟူသည်မှာ သိမ်သမုတ်ရာသို့ တနယ်လုံးရှိ ရဟန်းသံဃာ အားလုံးကို သိမ်းပြီး ပင့်ဖိတ်ရပါသည်။

အကယ်၍ သိမ်သမုတ်ရာသို့ မကြွနိူင်သော သံဃာများရှိပါက ထိုသံဃာရှိရာကျောင်း တိုက်သို့သွား၍ ဆန္ဒမသိုးစေရန် နေချင်းပြီးဆန္ဒတောင်းပြီးမှ ကမ္မဝါစာဖြင့် ရွတ်ဖတ် သမုတ်ရသောသိမ် ဖြစ်ပါသည်။

တခါတရံ မိမိတို့ သတင်းသုံးရာ ဂါမခောတ် (ရွာနယ်မြေ) မှာကျယ်ဝန်းလွန်း၍ နယ်မသိမ်းနိူင်သော ကြောင့်လည်းကောင်း၊ လှည်း၊ မော်တော်ကား၊ ရထား စသည် ဖြတ်သွားဖြတ်လာ အဝင်အထွက် အလွန်များသဖြင့် နယ်သိမ်းရန် ခက်ခဲသောကြောင့် လည်းကောင်း၊ နယ်သိမ်းသိမ် သမုတ်ရန် မကြွနိူင်သော တနယ်လုံး သံဃာများ၏ ဆန္ဒကို တောင်းခံတဲ့အခါ ဆန္ဒကိုဒေသနာနှင့် အညီ
(၁)ဆန္ဒံ ဒမ္မိ-တပည့်တော် ဆန္ဒပေးပါ၏၊
(၂)ဆန္ဒံ မေ ဟရ- တပည့်တော်၏ ဆန္ဒကို သံဃာ့ထံသို့ ဆောင်သွားပါ၊
(၃) ဆန္ဒံ မေ အာရောစေတိ- တပည့်တော်၏ ဆန္ဒကို သံဃာတော်အား လျှောက်ထားပါလို့ပေးတတ်သော ရဟန်းတော်များ ရှားပါးနေပါက လည်းကောင်း နယ်သိမ်းသိမ်သမုတ်ရန်အခက်အခဲနှင့် ကြုံရတတ်ပါသည်။



ဝိသုံဂါမ(သီးခြားရွာ) တောင်း၍ သမုတ်ခြင်း
========================
ယင်းသို့သော အခက်အခဲများကို ကျော်လွားနိူင်ရန် ယင်းဂါမခောတ်၊ ဂါမသိမ်မှ သီးခြားသိမ်တစ်လုံးစာ ရွာစားနာမည်မှည့်၍ ရွာနယ်မြေကလေး တောင်းပြီး သိမ်သမုတ်ကြခြင်းကို ဝိသုံဂါမ(သီးခြားရွာ) သိမ်ဟုခေါ်ပါသည်။ ကျောင်းတိုက်တစ်ခု တစ်တိုက်လုံး တည်ထောင်ပြီး၊ ဆောက်လုပ်ပြီး ယင်းကျောင်းတိုက် အတွင်းမှ သိမ်ကျောင်း တစ်နေရာစာလေးကို ဝိသုံဂါမ (သီးခြားရွာ)လိုကျောင်းဒကာ(သို့)လျှောက် ထားသူ ပိုင်မြေဟု ရွာစားနာမည် ပေးလိုက်ခြင်းဖြင့် မည်သူ့ကိုမှ မထိခိုက်၊ မနစ်နာစေပါ။ အရှိမြေကွက် တစ်ခုကို ဝိသုံဂါမ(သီးခြားရွာ)ဟု သတ်မှတ်ပေးလိုက် ခြင်းမျှသာဖြစ်ပါသည်။

ယင်းသို့ သတ်မှတ်ပေးရာ၌ ယင်းမြေကွက်ကို ဖျက်မရအောင် အပိုင်အဆိုင် ပေးမူ မပေးမူနှင့်လည်း မသက်ဆိုင်ပါ။ သိမ်သမုတ်လို့ လွယ်ကူစေရန် လျှေက်ထားသူကို ရွာစားနာမည်မှည့်၍ ဝိသုံဂါမ (သီးခြားရွာ)ဟု ပေးလိုက်ခြင်းသာ ပဓာနဖြစ်ပါသည်။ အချို့ ကျောင်းတိုက်မှာ သာသနာ့မြေဟု သတ်မှတ်ပြီးမှ ခိုင်သထက်ခိုင်၊ မြဲသထက်မြဲရန်၊ အထူးသန့်ရှင်းရန် ယင်းသာသနာ့ မြေထဲမှ သိမ်တစ်လုံးစာကို ဝိသုံဂါမ(သီးခြားရွာ) အဖြစ်လျှောက်ထား၍ ပေးခြင်းမှာလည်း မည်သူ့ကိုမျှ မထိခိုက် မနစ်နာစေခြင်းကြောင့် သိမ်မိန့်ပေးနိူင်သူ၊ သာသနာတော်ကို အထူးကြည်ညိုသူများက အလွယ်တကူ ချပေးသင့်ပါသည်။

သာသနာ သန့်ရှင်းတည်တံ့ ပြန့်ပွားရေးကို အထူးဆောင်ရွက် ပေးလိုက်ခြင်းလည်း မည်ပါသည်။ အမ်ိန့်ချပေးလိုက်သော ဝိသုံဂါမ (သီးခြားရွာ) သည် သိမ်သမုတ်ကံအောင်မြင်ရန် ရာနူန်းပြည့်ရှိပါသည်။ ယင်းသို့ သိမ်မိန့်တောင်းခံ၍ အစိုးရမင်းတို့မှဝိသုံဂါမ(သီးခြားရွာ) အဖြစ်ရရှိပြီးနောက် သိမ်အဖြစ် မြဲနေစေရန် ကမ္မဝါစာဖြင့် ရွတ်ဖတ်၍ သမုတ်သော သိမ်သည် “ဗဒ္ဓသိမ်”ဖြစ်ပါသည်။

သိမ်သည်သာသနာတော်၏အသက်
====================
အောင်မြင်သော သိမ်ဖြစ်ပါမှ ရဟန်းအစစ်များ ပေါ်ပေါက်ပြီး ဝိနည်းလေးစားသော ရဟန်းတော်များ အတွက် ဥပုသ်ကံ ပဝါရဏာကံ စသော ကံကြီး ကံငယ်များ ဆောင်ရာတွင် အထူးချမ်းသာမည် ဖြစ်ပါသည်။ အောင်မြင်သော သိမ်၌ ရဟန်းခံခြင်း၊ ဥပုသ်ပြုခြင်းပြုသည့်အခါ ယုံမှားသံသယ မဖြစ်စေဘဲ ကိုယ်ရောစိတ်ပါ နှစ်ဖြာသုခ ရရှိကြမှာ အမှန်ဖြစ်ပါသည်။ မိမိတို့ ရဟန်းတော်များအတွက်
သိမ်သည် အသက်တမျှ အရေးကြီးလှ၍ သာသနာတော်၏ အသက်ဟု ခေါ်ဆိုရမည် ဖြစ်ပါသည်။

သိမ်ရှိမှ ရဟန်းဖြစ်မည်
=============
ဝိနည်း စူဠဝါအဋ္ဌကထာ၊ သံဃ ဘေဒကက္ခန္ဓက၌ ရဟန်းဖြစ်ရန် အင်္ဂင်္ါ(၅)ချက်ရှိ ပါသည်။ထိုအချက်များမှာ
(၁)ဝတ္ထုသမ္ပတ္တိ- ရဟန်းခံနိူင်လောက်သော လူပုဂ္ဂိုလ် ဗျတ္တိ၊ ပဋိဗလနှင့် ပြည့်စုံခြင်း
(၂)ဉတ္တိသမ္ပတ္တိ-သုဏာတုမေ စသည်ဖြင့် ဉာတ်ထားမူနှင့် ပြည့်စုံခြင်း။
(၃)ပရိသာ သမ္ပတ္တိ- ကာရက ရဟန်းသံဃာ အနည်းဆုံး (၄)ပါးနှင့်ပြည့်စုံခြင်း။
(၄) ကမ္မဝါစာ သမ္ပတ္တိ- ကမ္မဝါစာ (၃)ကြိမ် ရွတ်ဖတ်မူနှင့် ပြည့်စုံခြင်း။
(၅) သီမာသမ္ပတ္တိ- သိမ်ရှိမူ၏ ပြည့်စုံခြင်းတို့ ဖြစ်ပါသည်။

အထက်ပါ အချက်ငါးချက်တို့တွင် သိမ်တစ်ခုဖြစ်ဖို့ အလွန်အရေးကြီးသလို၊အလွန်တရာမှခက်ခဲလှပါသည်။ သိမ်တစ်ခုဖြစ်ရန်သက်ဆိုင်ရာမှ ခွင့်ပြုမိန့်ယူရခြင်၊ ခွင့်ပြုမိန့်ရပြီးပါက သံဃာတော်များစွာ ပင့်ဖိတ်၍ အကြိမ်ကြိမ်အခါခါ သိမ်နူတ်ခြင်း၊ သိမ်သမုတ်ခြင်းများ ပြုရခြင်း၊ သိမ်အဆောက်အဦး ဖြစ်ရန် နဝကမ္မ ဝတ္ထုငွေကြေးများ မတည် စုဆောင်းရခြင်း စသော ကိစ္စများမှာ ခက်ခဲမည်မှာအမှန်ဖြစ်ပါသည်။

သိမ်နှင့်ပတ်သက်သောအယူမှားများ
===================
အိမ်ခြံမြေတွေ လူနေအိမ်ခြေတွေ သိမ်ရိပ်ထိုးရင် မကောင်းဘူးဆိုတာ မဟုတ်ပါဘူး ခင်ဗျာ။ အချို့ကလည်း သိမ်ထဲကို အမျိုးသမီးမဝင်ရဆိုပြီး အယူသီးတာတွေ ရှိပါတယ်။ အမှန်တော့ မဟုတ်ပါဘူး။ သိမ်ထဲကို အမျိုးသမီးရော အမျိုးသား လူဝတ်ပုဂ္ဂိုလ်တွေ ဝင်လို့ မသင့်တော်တဲ့အချိန်တစ်ခုတော့ရှိပါတယ်။ အဲဒါကတော့ ရဟန်းတွေ ကံကြီးကံငယ်လို့ခေါ်တဲ့ ဥပုသ်ပြုခြင်း၊ ရဟန်းအဖြစ်သို့ တက်ရောက်ခြင်း အချိန်တွေမှာ ဝင်လို့ မသင့်တော်ပါဘူး။

သိမ်ရိပ်ထိုးလို့ လူမနေကောင်းဘူး ဆိုတာကို ထင်ရှားအောင် ဥပမာပြရရင်…ဗုဒ္ဓဘုရားရှင် လက်ထက်က ရာဇဂြိုဟ်မြို့ကြီးတစ်မြို့လုံးကို သိမ်မြေနေရာအဖြစ် သတ်မှတ်ဖူးတဲ့ သာဓက ရှိပါတယ်။ ဆိုတော့… ရာဇဂြိုဟ် တစ်မြို့လုံးဟာ သိမ်ကြီးတစ်ခု ဖြစ်နေပါတယ်။

မြို့ထဲမှာပဲ လူတွေနေထိုင်ကြ၊ အိမ်ထောင်သားမွေးပြုကြ၊ အညစ်အကြေးစွန့်ကြတာတွေ ရှိပါတယ်။သို့သော်… ဘာအပြစ်မှ သက်ရောက်ခြင်းမရှိပါဘူး။ သိမ်နယ်မြေထဲမှာ နေထိုင်ရတဲ့အတွက် အန္တရာယ်တောင် ကင်းနိုင်ပါသေးတယ်။

အမှန်တော့ သိမ်= သီမ(ပါဠိ) သိမ်ဆိုတာ နယ်နိမိတ်သတ်မှတ်ခြင်းဆိုတဲ့ အဓိပ္ပာယ်ပါ။ ဘယ်လို နယ်နိမိတ်လည်းဆိုတော့ သာသန နယ်မြေအဖြစ် အခိုင်အမာ သတ်မှတ်ခြင်း တစ်ခုလို့ ယူရင် ရနိုင်ပါကြောင်း…။

ရှင်ဥတ္တမ