ဥသျှစ်ကုန်းကျေးရွာ မီးလင်းပြီ

စစ်ကိုင်းတိုင်းဒေသကြီး အင်းတော်မြို့နယ် မော်လူးဒေသ ဥသျှစ်ကုန်းကျေးရွာတွင် ကျေးလက်ဒေသဖွံ့ဖြိုးရေးအတွက် နိုင်ငံတော်မှ ချပေးသည့် နေရောင်ခြည်စွမ်းအင်သုံး ဆိုလာပြားများဖြင့် မီးလင်းနေပြီ ဖြစ်သည်။
သတင်းအရင်းအမြစ် - ကျောက်တူးသမားလေး

ချောင်းကူးတံတား အသစ်တည်ဆောက်

ပင်ဝယ်ကျေးရွာ ဘူတာချောင်းကူးတံတား အသစ်တည်ဆောက်
> အင်းတော်၊ ဒီဇင်ဘာ ၃၀
> @@@@@@@@@@@@@@@@@@@@@@@@@@@@
> စစ်ကိုင်းတိုင်းဒေသကြီး၊ အင်းတော်မြို့နယ်၊ ပင်ဝယ်ကျေးရွာအုပ်စု၊ ပင်ဝယ်ကျေးရွာ ဘူတာချောင်းကူးတံတားကို ဒီဇင်ဘာ ၃၀ ရက်နေ့က အသစ်တည်ဆောက်ခဲ့ကြောင်း သိရသည်။
> တံတားဖြစ်မြောက်ရေးအဖွဲ့ အကျိုးတော်ဆောင် ဦးထွန်းစိန်နှင့် ဦးမောင်ဝင်းတို့ ဦးစီးဦးဆောင်၍ ပင်ဝယ်ကျေးရွာမှ စေတနာအလှူရှင်များ ထည့်ဝင်ငွေကျပ် သိန်း ၇၀ ခန့်ဖြင့် မတည်ကာ စေတနာလုပ်အားပေး အင်အား ၅၀ ခန့်ဖြင့် အဆိုပါ ဘူတာချောင်းကူးတံတားကို ဒီဇင်ဘာ ၂၆ ရက်မှ စတင်တည်ဆောက်ခဲ့ရာ ၂၀၁၅ ဇန်နဝါရီလ ၁ ရက်နေ့တွင် အပြီးတည်ဆောက်မည်ဖြစ်ကြောင်း၊ ယင်းတံတားသည် အရှည် ၃၂ ပေ၊ အကျယ် ၁၃ ပေရှိသော လှည်းကူး၊ ကားကူး သစ်သားတံတားဖြစ်သည်။
> "ဒီတံတားဟာ ပင်ဝယ်ကျေးရွာနဲ့ သုဿာန်သွားလမ်းမကြီးပေါ်မှာရှိတဲ့ ဘူတာချောင်းကူးတံတားပါ။ အရင်ကတည်းက တံတားမရှိတဲ့အတွက် နွေမိုးဆောင်း သွားလာရေးမှာ အခက်အခဲတွေနဲ့ ကြုံတွေ့နေရတာပါ။ ဒီချောင်းကို ဖြတ်သွားမှ လိုရာခရီးကို ရောက်နိုင်တာလေ။ ဒါ့ကြောင်း ဒီဘူတာချောင်းကူးတံတားဟာ တစ်ရွာလုံးအတွက် မရှိမဖြစ်လိုအပ်နေတဲ့ တံတားပါ။ နိဗ္ဗာန်ယာဉ်တွေ၊ ထော်လာဂျီယာဉ်တွေ ဒီချောင်းရိုးကနေ အဓိကအားထားပြီး သွားလာနေရတာပါ"ဟု တံတားတည်ဆောက်ရေးတွင် လုပ်အားဒါန ပေးလှူနေသူ အသက်(၈၃)နှစ်အရွယ်ရှိ ပင်ဝယ်ကျေးရွာနေ ဦးတင်မောင်(ဗန္ဓုလ)မှ ဝမ်းသာအားရပြောပြသည်။
>

ကျေးရွာချင်းဆက် လမ်းမကြီးစုပေါင်းပြုပြင်

အလယ်ကျွန်းကျေးရွာ ကားလမ်းမကြီး စုပေါင်းပြုပြင်
အင်းတော်၊ ဒီဇင်ဘာ ၃၀
@@@@@@@@@@@@@@@@@@@@@@@@@
စစ်ကိုင်းတိုင်းဒေသကြီး၊ အင်းတော်မြို့နယ်၊ အလယ်ကျွန်းကျေးရွာအုပ်စု၊ အလယ်ကျွန်းကျေးရွာနှင့် သူရောင်းကျေးရွာသို့ ဆက်သွယ်ထားသော ကားလမ်းမကြီးကို ဒီဇင်ဘာ ၃၀ ရက်နေ့က စုပေါင်းပြုပြင်ခဲ့ကြောင်း သိရသည်။

အလယ်ကျွန်းကျေးရွာအုပ်စုတွင် ကျေးရွာပေါင်း ၆ ရွာပါဝင်ပြီး၊ အလယ်ကျွန်းကျေးရွာတွင် အိမ်ထောင်စု(၁၄၀) လူဦးရေ ၇၄၇ ဦး နေထိုင်ကြပြီး အများစုမှာ လယ်ယာစိုက်ပျိုးရေးလုပ်ငန်း၊ ငါးမွေးမြူရေးလုပ်ငန်းများကို လုပ်ကိုင်ကြသည်။ အဆိုပါ ကျေးရွာချင်းဆက် ကားလမ်းမကြီးသည် အင်းတော်မြို့နယ်၊ မော်လူး-သူရောင်း- အလယ်ကျွန်းကျေးရွာများမှတစ်ဆင့် ဗန်းမောက်မြို့နယ်နှင့် ပင်လယ်ဘူးမြို့နယ်များသို့ အလွယ်တကူ ဖြတ်သန်းသွားလာနိုင်သော လမ်းမကြီးဖြစ်သည်။ ကျေးရွာချင်းဆက် ကားလမ်းမကြီး ပြုပြင်ရာသို့ အလယ်ကျွန်းကျေးရွာအုပ်စု၊ အုပ်ချုပ်ရေးမှူး ဦးညွှန့်ဝင်း၊ ရာအိမ်မှူး ဦးဖိုးထော်နှင့် ဆယ်အိမ်စု ၁၄ စုတို့မှ ဒေသခံ ၁၀၀ကျော်တို့လာရောက်ပြီး သူရောင်းကျေးရွာနှင့် အလယ်ကျွန်းကျေးရွာအကြား ရှစ်မိုင်ခန့်အတွင်းရှိ ပျက်စီးနေသည့် လမ်းပိုင်းများနှင့် လမ်းဘေးဝဲယာ ပေါက်ရောက်လျက်ရှိသော ချုံနွယ်ပေါင်းပင်များကို ခုတ်ထွင်ရှင်းလင်းခြင်း၊ မိုးတွင်းကာလက ပျက်စီးယိုယွင်းခဲ့သည့် လမ်းပိုင်းများကို လမ်းအကျယ် ၁၂ပေခန့်အထိ ပြန်လည်ပြုပြင်ခြင်းတို့ကို ဆောင်ရွက်ကြပြီး၊ စေတနာအလှူရှင်များကလည်း နံနက်စာ ထမင်းဟင်းလျာများ အချိုရည်များဖြင့် ကျွေးမွေးလှူဒါန်းခဲ့ကြောင်း သိရသည်။
"ဒီကျေးရွာချင်းဆက် ကားလမ်းမကြီးဟာ ကျွန်တော်တို့ ကျေးရွာအတွက် အရေးပါတဲ့လမ်းမကြီးပါ။ ဒီလမ်းမကြီးကနေတစ်ဆင့် အင်းတော်မြို့နယ်၊ ဗန်းမောက်မြို့နယ်ကနေ ပင်လည်ဘူးမြို့နယ်အထိ သွားလာလို့ရပါတယ်။ ကျွန်တော်တို့ ဒေသခံတောင်သူတွေဟာ လယ်ယာလုပ်ငန်းသိမ်းပြီးတဲ့အချိန်မှာ ထော်လာဂျီတွေ နွားလှည်းတွေနဲ့ စပါးနဲ့ အခြားလယ်ယာထွက်ကုန်ပစ္စည်းတွေကို ဒီလမ်းမကြီးကနေပဲ သယ်ယူပို့ဆောင်ရပါတယ်။ လမ်းက မြေသားလမ်းဆိုတော့ မိုးရာသီရောက်ရင် လမ်းက ပျက်စီးတာမို့ ကျွန်တော်တို့ ရွာခံတွေ နှစ်စဉ်နှစ်တိုင်း ပြုပြင်နေကြရတာပါ။ နောက်နှစ်တွေမှာ မြေသားလမ်းကနေ ကျောက်ချောလမ်းမအဖြစ် အဆင့်မြင့်တင်နိုင်အောင် ကြိုးစားနေပါတယ်" ဟု ကျေးရွာချင်းဆက် ကားလမ်းမကြီး စုပေါင်းပြုပြင်ရာတွင် ပါဝင်သည့် အလယ်ကျွန်းကျေးရွာ အုပ်စု အုပ်ချုပ်ရေးမှူး ဦးညွှန့်ဝင်းမှ ပြောပြသည်

သူရောင်းကျေးရွာတွင် သဘာဝစိမ့်စမ်းရေ ပေးဝေလျက်ရှိ

သူရောင်းကျေးရွာတွင် သဘာဝစိမ့်စမ်းရေ ပေးဝေလျက်ရှိ
မော်လူး၊ ဒီဇင်ဘာ ၃၀
@@@@@@@@@@@@@@@@@@@@@@@@@@@@@
စစ်ကိုင်းတိုင်းဒေသကြီး၊ အင်းတော်မြို့နယ်၊ မော်လူးဒေသ၊ သူရောင်းကျေးရွာအုပ်စု၊ သူရောင်းကျေးရွာတွင် သောက်သုံးရေ ရရှိရေးအတွက် သဘာဝစိမ့်ထွက်ရေကို သွယ်ယူကာ ကျေးရွာအတွင်းသို့ ပေးဝေလျက်ရှိကြောင်း သိရသည်။
သူရောင်းကျေးရွာသည် လေးတန်းချောင်းဘေးတွင် တည်ရှိသော ကျေးရွာတစ်ရွာဖြစ်ပြီး လေးတန်းချောင်းဖျား ရွှေတွင်းရွှေမှော်များတွင် ရွှေတူးဖော်ခြင်းလုပ်ငန်းကြောင့် ချောင်းရေ နောက်ကျိကာ သောက်သုံးရေအတွက် အခက်အခဲများရှိလာသဖြင့် ကျေးရွာနှင့် ၃ မိုင်ခန့်ကွာဝေးသော စည်ပိန်းကျေးရွာ ဘုန်းတော်ကြီးကျောင်းအနီး မြေကြီးအတွင်း စိမ့်ရေပေါက်မှ ရေကို ရေလှောင်ကန်တည်ဆောက် သိုလှောင်ပြီး ပိုက်များဖြင့် သွယ်ယူကာ သောက်သုံးရေရရှိရေးကို ကျေးရွာအတွင်းသို့ ပေးဝေနိုင်ရန်ဆောင်ရွက်ခဲ့ကြသည်။ အဆိုပါကျေးရွာသည် အိမ်ထောင်စု ၃၀၅၊ လူဦးရေ ၂၈၅၀ဦးခန့် နေထိုင်ပြီး လယ်ယာစိုက်ပျိုးရေးလုပ်ငန်း၊ အုတ်ဖုတ်လုပ်ငန်း၊ လယ်ယာထွက်ကုန်ပစ္စည်း ရောင်းဝယ်ရေးလုပ်ငန်းများကို လုပ်ကိုင်ကြသည်။ ယင်းကျေးရွာတွင် အများစုမှာ ယခင်က သောက်သုံးရေရရှိရေးအတွက် လေးတန်းချောင်းအတွင်း လက်ယက်တွင်းများပြုလုပ်ကာ သုံးစွဲခဲ့ကြကြောင်း၊ ယခုအခါ အဆိုပါ လေးတန်ချောင်းရေမှာ နွေမိုးဆောင်း တစ်နှစ်ပတ်လုံး နောက်ကျိနေသည့်အတွက် သောက်သုံးရေအခက်အခဲမှာ ရွာသူ/သားများအတွက်သာမက လယ်ယာလုပ်ငန်သုံး ကျွဲနွားများအတွက်ပါ အခက်အခဲရှိလာသဖြင့် သဘာဝစိမ့်စမ်းရေ ရရှိရေးကို ၂၀၁၄ ခုနှစ် ဇန်နဝါရီလမှ စတင်ကာ အကောင်အထည်ဖော်ဆောင်ရွက်ခဲ့ရာ ၂၀၁၄ ခုနှစ် မေလတွင်ပြီးစီးခဲ့ကြောင်း၊ သဘာဝစိမ့်စမ်းရေ သိုလှောင်ကန်မှာ အလျား ၇၀ပေ၊ အနံ ၃၀ပေ၊ အမြင့် ၁၄ ပေ၊ ရေထု ၁၀ပေရှိကြောင်း၊ ရေလှောင်ကန်မှ ကျေးရွာအထိ ပေ ၁၅၀၀၀ ခန့်အထိ ၄ လက်မပိုက်နှစ်လိုင်းဖြင့် သွယ်ယူကာ ကျေးရွာအတွင်းသို့  သုံးလက်မ၊ နှစ်လက်မ ပိုက်များဖြင့် မီးဘေးအန္တရာယ်ကာကွယ်ရေးအတွက် မီးသတ်ရေတိုင် ၃၃တိုင်၊ အိမ်ထောင်စု ၁၆၃ စုကို ငါးမူးပိုက်များဖြင့် ပေးဝေထားပြီး ကျန်အိမ်ထောင်စုများသို့လည်း သဘာဝစိမ့်စမ်းရေ ဆက်လက်ပေးဝေရန် အစီအစဉ်ရှိကြောင်း သိရသည်။
"ကျွန်တော်တို့ သူရောင်းကျေးရွာမှာ သဘာဝစိမ့်စမ်းရေ ရရှိဖို့ရာ မရှိမဖြစ်လိုအပ်လို့ လုပ်ခဲ့ရတာပါ။ အရင်က ရွာဘေးက ဖြတ်သန်းစီးဆင်းသွားတဲ့ လေးတန်ချောင်က ရေကိုပဲ သောက်သုံးရေအဖြစ် သုံးစွဲခဲ့ကြတာပါ။ လွန်ခဲ့တဲ့ လေးနှစ်လောက်ကစပြီး ချောင်းရေဟာ သုံးစွဲမရအောင် နောက်ကျိလာပါတယ်။ ဒါကြောင့် သောက်သုံးရေရှိဖို့ရာအတွက် ချောင်းအတွင်းမှာ လက်ယက်တွင်းတွေတူးပြီး သောက်သုံးရေအခက်အခဲကို ဖြေရှင်းခဲ့ကြပါသေးတယ်။ ဒါပေမယ့် လစဉ်မိုးရွာတဲ့အချိန်တွေမှာ ခဏခဏပြန်ပြန်တူးနေရတဲ့အတွက် ရေရှည်မှာ အဆင်မပြေနိုင်လို့ စိမ့်စမ်းရေရှိရေးကို ဆောင်ရွက်ခဲ့ရတာပါ။ ရေရရှိရေးအတွက် ကနဦးမတည်ငွေက ကျပ်သိန်း ၄၀၀ ရယ် နိုင်ငံတော်ကချမှတ်ပေးတဲ့ ကျေးလက်ဒေသဖွံဖြိုးရေး ရံပုံငွေမှ ၁၅ သိန်းနဲ့ စတင်အကောင်အထည်ဖော်ဆောင်ရွက်ခဲ့တာ အခုဆိုရင် ကျေးရွာအတွင်းကို သဘာဝစိမ်းစမ်းရေ ပေးဝေနိုင်ခဲ့ပါပြီ။"ဟု သူရောင်းကျေးရွာ သဘာဝစိမ့်စမ်းရေး ရရှိရေး အကျိုးတော်ဆောင် ကော်မတီ ဥက္ကဋ္ဌ ဦးကျော်ဋ္ဌေးမှ ပြောပြသည်။