နောက်မိုးကောင်း၍ စပါးအောင်မြင်
နောက်မိုးကောင်း၍ စပါးအောင်မြင်
မော်လူး၊ စက်တင်ဘာ ၂၂
စစ်ကိုင်းတိုင်းဒေသကြီး၊ အင်းတော်မြို့နယ်၊ မော်လူးဒေသတွင် စပါးစိုက်ဧရိယာ ( ) ခန့်ရှိရာ ယခုနှစ် မိုးရာသီတွင် စပါးစိုက်ပျိုးချိန်၌ မိုးဦးမကောင်း၍ ဒေသခံတောင်သူ လယ်သမားများအနေဖြင့် ချောင်းများမြောင်းများမှ ငွေကုန်ကြေးကျခံ၍ ရေတင်ပြီး ပျိုးထောင် စိုက်ပျိုးကြရသည်။ ဇွန်၊ ဇူလိုင်၊ သြဂုတ်လများတွင် တစ်ကြိမ်မျှ မဖြစ်ဘူးသော မိုးခေါင်ရေရှားဒဏ်ကို ဒေသခံလယ်သမားများ အလူးအလဲ ခံကြရသည်။ သက်ဆိုင်ရာတို့မှ ထုတ်ချေးပေးသော စိုက်ပျိုးစရိတ်ချေးငွေမှာ တစ်ဧက တစ်သိန်းသာရ၍ အချို့ လယ်သမားတို့မှာ ရေတင်ရန် ဒီဇယ်ပင် ပြည့်စုံအောင် မရနိုင်ကြပေ။ ထို့ကြောင့် လယ်သမားအများစုမှာ မိုးခေါင်လွန်း၍ သီးနှံမအောင်မြင်လျှင် ချေးငွေမည်သို့ပေးဆပ်ရမည်ကို စိုးရိမ်စိတ်များဖြင့် သောက ရောက်နေကြရသည်။
သြဂုတ်လစတုတ္ထပတ်တွင် မိုးမှာ ကောင်းလာရုံမျှမက အားကြီးသည်းထန်လွန်း၍ လယ်များပင်မက မော်လူးရွာထဲတွင်ပါ ရေကြီးခြင်း အကြိမ်ကြိမ်ကြုံရတော့သည်။
မိုးဦးတံ့သော်လည်း မိုးလယ်၊ မိုးနှောင်း ဤလိုကောင်းခဲ့လျှင် လယ်စိုက်စပါးပင်များ ဖြစ်ထွန်းကောင်းမွန်၍ အသီးအနှံ အောင်မြင်ရန် အလားအလာကောင်းသဖြင့် စိုက်စရိတ် ချေးငွေများ ပေးသွင်းနိုင်ကြမည်ကို တွေး၍ ပျော်ရွှင်နေကြသည်။
"ပျိုးထောင်ချိန်တုန်းက ရေကမရ၊ ရေတင်ပြန်တော့လည်း၊ လယ်ကျယ်သူနဲ့ ချောင်းဝေးလွန်းသူတို့အတွက် ကုန်ကျစရိတ်ကများ အတော်ကြီးဒုက္ခရောက်ခဲ့ရတယ်။ ကျွန်တော်ဆိုရင် ရေတင်လို့ စိုက်ပြီးတဲ့နောက်တစ်နေ့စ မိုးရွာလိုက်တာ စိုက်စမှာ ကောက်ပင်တွေ အကုန်မြုပ်တယ် သွားတယ်။ တစ်ညနဲ့ ရေပြန်ကျသွားလို့ စိုးရိမ်စရာတော့ မရှိပါဘူး။ ဒါပေမယ့် ပိုးမကျဖို့ တစ်ခုဘဲ စိုးရိမ်ရတာပေါ့။"ဟု လယ်သမားကြီး တစ်ဦးက ပြောပြသည်။
မိုးဦးတွင် မိုးခေါင်၍ စိတ်သောကရောက်ကြရသော လယ်သမားများအဖို့ ယခုလို စပါးစိုက်လယ်များ အောင်မြင်ဖြစ်ထွန်းကြသဖြင့် ကျေးရွာ အထောက်အကူပြု ကော်မတီမှ လိုအပ်သော ဓာတ်မြေသြဇာနှင့် ပိုးသတ်ဆေးများ ပံ့ပိုးပေးနိုင်ရန် ဒေသခံ စပါးစိုက်တောင်သူ လယ်သမားများက စောင့်စားနေကြကြောင်း သိရသည်။
စစ်ကိုင်းဝင်းရွှေ
No comments:
Post a Comment