ဒီပင်္ကရာစေတီတော်မြတ် ဗုဒ္ဓပူဇနိယပွဲတော်တွင် အဟောင်းထည် ဘေထုပ်များ ရောင်းအားကောင်း
မော်လူး၊ ဖေဖော်ဝါရီ ၄
@@@@@@@@@@@@@@@@@@@@@@@@@@@@@@@@@@@
စစ်ကိုင်းတိုင်းဒေသကြီး၊ အင်းတော်မြို့နယ်၊ မော်လူးဒေသ သမိုင်းဝင် ဒီပင်္ကရာစေတီတော်မြတ် ဗုဒ္ဓပူဇနိယပွဲတော်တွင် အဟောင်းထည် ဘေထုပ်များ ရောင်းအားကောင်းခဲ့ကြောင်း သိရသည်။
နှစ်စဉ်ကျင်းပမြဲဖြစ်သည့် မော်လူးဒေသ၊ ကိုးတိုက်နယ်၊ (၁၀)အုပ်စု၏ သမိုင်းဝင် ဒီပင်္ကရာစေတီတော်မြတ် ဗုဒ္ဓပူဇနိယပွဲတော်တွင် အနယ်နယ်အရပ်ရပ်မှ လာရောက်ရောင်းချကြသည့် ဈေးသည်များဖြင့် စည်ကားလျှက်ရှိရာ အထူးသဖြင့် အဟောင်းထည် ဘေထုပ်ရောင်းချသူများမှာ ရောင်းအားကောင်းခဲ့သည်။
"ဒီနှစ်မှာ ဒေသခံအများစုဟာ တန်ဘိုးကြီးတဲ့ အဝတ်အထည်တွေကို မဝယ်ယူကြတော့ပဲ တန်ဘိုးနည်း အဝတ်အထည်တွေကိုသာ ဝယ်ယူကြတာမို့ ကျွန်တော်တို့ အဟောင်းတည်တွေဘက်ကို ဦးလှည့်လာကြတာပါ။ ကလေးဝတ်အင်္ကျီတွေဆို ငွေ ၅၀၀ ကျပ်နဲ့ နှစ်ထည်ရတယ်။ လူကြီးဝတ်က အနွေးထည်တစ်ထည်ကို ၁၀၀၀ ကျပ်နဲ့ ရောင်းချပါတယ်။ ဒီတော့ ငွေ ၅၀၀/၁၀၀၀ လောက်နဲ့ ရောင်းချပေးတာဆိုတော့ ဝယ်ယူတဲ့သူတွေအတွက် အဆင်ပြေစေတဲ့ နှုန်းထားဖြစ်နေတာပေါ့။ ဈေးရောင်းရတာလည်း အရင်နှစ်တွေထက် ရောင်းအားနည်းပါတယ်။ ပွဲတော်နောက်ဆုံးရက်မှာတော့ လျှော့ဈေးတွေနဲ့ ရောင်းချနေတာပါ။ ဘာလို့လဲဆိုတော့ ဒီအထည်တွေကို ကျွန်တော်တို့ ပြန်သယ်မသွားချင်တော့ဘူး ရတဲ့ဈေးနဲ့ အရှုံးခံရောင်းချပေးနေတာပါ။ တစ်ချို့ဆို လက်ဆောင်အနေနဲ့ အလကားပေးလိုက်တာမျိုးတွေလည်း ရှိပါတယ်။" ဟု ဒီပင်္ကရာ ဘုရားပွဲတော်တွင် အဟောင်းထည်များကို ရောင်းချသည့် ဆိုင်ရှင်တစ်ဦးမှ ပြောပြသည်။
" ဒီနှစ် ဘုရားပွဲကတော့ တော်တော်စည်ကားပါတယ်။ ဈေးဆိုင်ခန်းပေါင်း ၈၀၀ ကျော်နဲ့ ပစ္စည်းမျိုးစုံရောင်းချနေတာပါ။ လယ်ယာသုံးပစ္စည်းတွေ၊ အဝတ်အထည်တွေ၊ စားသောက်ကုန်တွေ အစရှိတာကို ရောင်းချနေကြတာပါ။ နှစ်စဉ်ကျင်းပတဲ့ ပွဲတော်မို့ ရန်ကုန်၊ မန္တလေး၊ မြစ်ကြီးနားစတဲ့ မြို့ကြီးတွေက ဈေးသည်တွေပါ လာရောက်ရောင်းချကြတာမို့ ပစ္စည်းစုံ အရောင်အသွေးစုံပါပဲ။ ဈေးသည်တွေ ရောင်းအားအကောင်းဆုံးကတော့ တပို့တွဲ လဆန်း ၁၄ ရက်နေ့ညနဲ့ ဆွမ်းကြီးလောင်းတဲ့ လပြည့်နေ့နဲ့ညမှာ အများဝယ်ယူကြတာပါ။ ကျွန်မကတော့ အိမ်က အမျိုးသားနဲ့ ကလေးတွေအတွက် အဟောင်းထည်အရောင်းဆိုင်က အင်္ကျီတွေ ဝယ်ဖြစ်ခဲ့ပါတယ်။ ဈေးပေါ့တယ်။ ဝတ်ရတာလည်း အဆင်ပြေတယ် ပြောရမှာပေါ့။ ဘယ်လိုပဲဖြစ်ဖြစ်လေ ၅၀၀/၁၀၀၀ ဆိုတာ ခေါက်ဆွဲ တစ်ပွဲဖိုးလောက်ပဲ ရှိတာမဟုတ်လား" ဟု ပွဲတော်သို့ လာရောက်သည့် သူရောင်းကျေးရွာမှ အိမ်ထောင်ရှင်မတစ်ဦးက ပြောပြသည်။
ယခုနှစ် ကျင်းပသည့် မော်လူးဒေသမှ သမိုင်းဝင် ဒီပင်္ကရာ စေတီတော်မြတ် ဗုဒ္ဓပူဇနိယပွဲတော်သည် ၁၀၄ ကြိမ်မြောက် ဖြစ်ကြောင်း၊ ယင်းပွဲတော်တွင် အနယ်နယ်အရပ်ရပ်မှ ဈေးသည်များ၊ ဘုရားဖူးလာရောက်ကြသူများ၊ သတင်းမှတ်တမ်းရိုက်ကူးလာသူများ၊ ဒေသခံ ဘုရားဖူးများဖြင့် တပို့တွဲလဆန်း ၁၀ရက်နေ့မှ လပြည့်နေ့အထိ စည်ကားသိုက်မြိုက်စွာ ကျင်းပခဲ့ကြောင်း သိရသည်။
No comments:
Post a Comment