ကျေးရွာချင်းဆက်လမ်း စုပေါင်းလုပ်အားဖြင့် ပြုပြင်
ကျေးရွာချင်းဆက်လမ်း စုပေါင်းလုပ်အားဖြင့် ပြုပြင်
မော်လူး၊ စက်တင်ဘာ ၂၃
စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ်၊ မော်လူးဒေသသည် ရွှေဘို - မြစ်ကြီးနား ပြည်ထောင်စုလမ်းမကြီး ဖြတ်သန်းသွားရာ၊ စတင်ဖောက်လုပ်သည်မှ နှစ်ကာလကြာပြီ ဖြစ်သဖြင့် အင်းတော် - မော်လူးလမ်းပိုင်းမှာ ပျက်စီးယိုယွင်းလျှက်ရှိသည်။ နဘားနှင့် မော်လူးကြား လမ်းပိုင်းကို သက်ဆိုင်ရာတို့အနေဖြင့် ယခုပွင့်လင်းရာသီတွင် ပြုပြင်ပေးသင့်ကြောင်း ဒေသခံတို့ထံမှ သိရသည်။
ထိုပြည်ထောင်စုလမ်းမကြီး၏ ဝဲယာတွင် အင်းတော်မြို့နယ်၊ မော်လူးဒေသ၊ မော်လူးအုပ်စု ကျေးရွာပေါင်း ၄၃ ရွာရှိရာ ထိုရွာများရှိ ကျေးရွာချင်းဆက်လမ်းများမှာ ကိုယ့်အားကိုယ်ကိုး ဖောက်လုပ်ထားကြရသော မြေသားလမ်းများသာ ဖြစ်သည်။
နေ့စဉ် ကားဆိုင်ကယ်စသော စက်တပ်ယာဉ်များအသွားအလာများခြင်းကြောင့်လည်းကောင်း၊ မိုးသည်းထန်မှုကြောင့်လည်းကောင်း၊ ရေကြီးရေလျှံမှုများကြောင့်လည်းကောင်း၊ ကျေးရွာချင်းဆက် လမ်းများသည် ပျက်စီးရသည်။ ထို့ကြောင့် ဒေသခံတို့က နှစ်စဉ် လုပ်အားဒါနဖြင့် မော်လူးအနောက်သုံးမိုင်ခန့်ဝေးသော ထုံးကျောက်တောင်မှ မြေများကို ထော်လာဂျီများ၊တုံဖုံးများဖြင့် လူလုပ်အားနှင့် တူးဆွသယ်ဆောင်၍ ခင်းကြရသည်။
စက်တင်ဘာ ၂၀ ရက်မှ စ၍ မော်လူးစံပြကျေးရွာ၏အနောက် သက်ရင်းတာ၊ ပဲခူး၊ ရွာရှည်၊ မလူး၊ ဂွေ့ကြီး၊ နန့်ရုံ၊ ကူးဆိပ်၊ ခိုးကောင် စသော ရွှေလေးတန်ချောင်းရိုးရှိ ခုနှစ်ရွာဆုံလမ်း အရှည် ၄ မိုင်ကျော်ခန့်ကို ကျေးလက် ဒေသခံအင်အား ၁၀၀ ကျော်ဖြင့် ၄ ရက်တိုင် လုပ်အားလှူဒါန်း၍ လမ်းဖို့ပြုပြင်ကြကြောင်း ဝမ်းမြောက်ဖွယ် တွေ့မြင်ရသည်။
အရှည်လေးမိုင်ရှိ ရွှေလေးတန်ရိုး ခုနှစ်ရွာဆုံလမ်းကို ယခုကဲ့သို့ လုပ်အားဒါနဖြင့် ပြုပြင်လမ်းဖို့သူ ၁၀၀ တို့အား စေတနာရှင်များက နံနက်စာ ထမင်းအာဟာရဒါန၊ ညနေစာ ထမင်းအာဟာရဒါန၊ အဖျော်ရည်နှင့် စားသောက်ဖွယ်မုန့်များစွာတို့ဖြင့် ကျွေးမွေးဒါနပြုကြကြောင်း သိရသည်။
"ဒီလေးတန်ရိုးလမ်းဟာ အစိုးရဘတ်ဂျက်နဲ့ ပြုလုပ်ထားတာ မဟုတ်ပါဘူး။ ဒေသခံ ခုနှစ်ရွာက ရွာသူရွာသားများ၏ လုပ်အား စေတနာဖြင့် ဖောက်လုပ်ထားတဲ့ လမ်းဖြစ်ပါတယ်။ ရေကျော်တံတားတွေဆိုရင်လည်း(၇)စင်းရှိတာ မိရိုးဖလာတံတားအဖြစ် ဆောက်ထားရတာပါ။ လမ်းအတွက် မဟုတ်သည့်တိုင် ဆောက်လုပ်ရေးက သံတူကွန်ကရစ်တံတားအဖြစ် ဆောက်လုပ်ပံ့ပိုးပေးရင် အားလုံးဝမ်းသာ ပျော်ရွှင်ကြပြီး လမ်းပန်းဆက်သွယ်ရေးလည်း ပိုကောင်းလာမှာပါ…။"ဟု ပဲခူးရွာမှ ဦးစိုးအောင်( ကိုယ့်အားကိုယ်ကိုး မီးလင်းရေးကောမတီ)ကပြောကြားသည်။
"အခု ဒီလေးတန်ရိုး ခုနှစ်ရွာဆုံလမ်းဟာ ဒေသတွင်း ဆက်သွယ်မှုရဲ့ အသက်လို့ ဆိုရမှာပါ။ ဒီလမ်းကလွဲလို့ မော်လူးကို ရောက်အောင် တစ်ခြားကွင်းလမ်းရယ်လို့ မရှိပါဘူး။ ဒါကြောင့် သက်ရင်းတာရွာဆရာတော်၊ ပဲခူးရွာဆရာတော်၊ ဂွေ့ကြီးရွာဆရာတော်တို့ကဦးဆောင်ပြီး ဒီလမ်းကို ပျက်စီးယိုယွင်း မခံဘဲ နှစ်စဉ်ပြုပြင်ရတာပါ။ ဒီနှစ်က မိုးဦးမှာ မိုးခေါင်ခဲ့ပေမဲ့ ၉ လပိုင်းထဲမှာ မိုးက ကောင်းရုံမက လွန်လွန်ကျွံကျွံ သည်းထန်ပြီး လယ်တွေပါ ရေလျှံ ရေမြုပ်တော့ လမ်းတွေပျက်တာပေါ့။ ဒီနှစ် ခုတစ်ကြိမ်နဲ့ပါဆို ၃ ကြိမ်ရှိသွားပါပြီ။ ဒေသခံတို့ရဲ့ လုပ်အားနဲ့ပြုပြင်တာဖို့ကြရတာ။ မြေကော်စက်တွေ မရှိဘဲ လူလုပ်အားနဲ့ မြေတူးတင်ရတော့ လက်ဝင်ပြီး ကြံ့ကြာမှုတော့ ရှိတာပေါ့။ သက်ဆိုင်ရာ လမ်းဋ္ဌာနက မြေကော်စက် Back Hole တစ်စင်းလောက် အကူအညီရရင် ဒီထက်ပိုပြီး ကောင်းအောင် လုပ်နိုင်မှာပါ…"ဟု သက်ရင်းတာကျေးရွာ ရာအိမ်မှူး ဦးမြင့်သောင်းမှ ပြောကြားသည်။
ဤရွှေလေးတန်ရိုး ခုနှစ်ရွာဆုံလမ်းသည် မလူး၊ မာန်ဟဲ၊ မြေပလ္လင်ကျေးရွာများကို ဖြတ်၍ စစ်ကိုင်းတိုင်းဒေသကြီးနှင့် ကချင်ပြည်နယ်- နယ်စပ် နန့်စီးအောင် ပေကုန်းထိ တစ်ဆက်တည်း ဖောက်လုပ်ထားသောလမ်းဖြစ်ကြောင်း၊ နန့်စီးအောင်တွင် ရွှေဘို - မြစ်ကြီးနား ပြည်ထောင်စုလမ်းမကြီးနှင့် ဆုံရာအထိ ခရီးတာ ၈ မိုင်ရှိကြောင်း သိရသည်။
စစ်ကိုင်းဝင်းရွှေ
No comments:
Post a Comment